Rev 9 | BEF | STEP | To agelo napa 5 ai ya'ma pikuli fu noligo nani bu go'ohuna. Sonofi moneuba minoto kokulumaguti ifi tito melugu nolimigo bu go'ohuna. To yatama kelimofihi kafe'a sigilibe luto yamofihi foloke'a emigo li'ehina.

Revelation of John 9

1 To agelo napa 5 ai ya'ma pikuli fu noligo nani bu go'ohuna. Sonofi moneuba minoto kokulumaguti ifi tito melugu nolimigo bu go'ohuna. To yatama kelimofihi kafe'a sigilibe luto yamofihi foloke'a emigo li'ehina. 2 To yatama kelimofihi kafe'a nosigigo lokiya sipi ti'ehina. Foya nolito sipi fi'mo nogoyotogo lokiya tilata nohina ya suhi huto keliguti ti'ehina. Lokiya ya'ma tito yegemofihi bu'aga to megesaga meya ifi to'ehina. 3 Ifi notago lokiyamofihi komopa'aguti atehi ya'ma melugu limi'ahana. Enabaga'ani ya'ma kakamuke'i ya suhi huto amuya moloto mino'ehina. 4 To enali melugu kifi yafa haya'a ya'ma bauna fite menalabe luto lu laga hu epolo'ehina. Bona'i Hu'mamofihi omiha'a enogobisalo meni'ilina'a enaligo ya'ma luba fi epalalabe luto lu epolo'ehina. 5 To atehi enali enehenogo fililabe luto meni'ibe. Fa'mene enoho mefililabe luto ikahi layahi mone kegi'a su henogo yamofihi komopa'agu akafu'i heni epelenogo keke'i lite enagabu ginogo lite minalabe luto keheli epi'ehina. Kakamuke'uba loholago usegi asegi ito mino'ohuta ya suhi hite enagabu gi epalalabe luto keheli epi'ehina. 6 To ana kanagu bona'i enali fililana kapo'ani'mu sa sa hilete lilana'a mefililana'mu yabe. Fililatamofihi ya'ma elesa meleba meleba hite sibigopa mefililana'mu yabe.

7 To atehi enali ya'ma hosi yagamofihi babeyafa hite luba bona'i enali lubalo bilune'mu hosi yaga li hekele epelelete bilata nehana suhi hite ya'ma lataha'anilo kakili golitu lolo hi'ahana suhi hu'ehina ya'ma mino'ehina. To enokaba'a ya'ma bona enokaba labaga legita yabe. 8 To oka'ani ya'ma yatama yatama ana'magihi oka'ani ya suhi huto to enabaga yogo'ani ya'ma laeoni yagafi akafu kalamagihi enabaga yogo'a tegi huto ni'ibe. 9 To kefe gu'ani ya'ma fepeha'ani aeonitu lolo hi'ahana suhi huto minago bu go'ohuna yabe. Koke'na'aniguti nogo molo'ehina ya'ma hosi yaga babu lite enali lubalo bilune'mu kelefefe hilata nehana kale legi hololu lite enonogo melelata nehana ya suhi huto mino'ehina. 10 Kasa'ani kakamuke'mofihi kasa'a ya suhi huto baga'a ya'ma kasa'aluga mino'ehina. Yaloti bona'i ikahi layahi mone kegi'a su hago yamofihi komopa'agu akafu'i heni epelete minalana'mu yabe. 11 To agelo moneuba keli yatamalo kaba hulata nohina ai enikibina bo'ani minolata hu'ehina gi'a Yuta bona'magihi kaguti Apatoni, to Kiliki bona'magihi kaguti Apolioni, to lali katiguti ya'ma gi'a enoholata bo yabe.

12 Ya'ma yata'a eniginaga fise nasana keta'a hiti ya'ma alo'i su habe. To loemo ya'ma huto hila'ibe luto lu'ehina.

13 Ya hulago agelo napa 6 ai ya'ma pikuli fu ligo mamufa gilata hita golitu lolo hi'ahana Hu'mamofihi bulo minolata nohina nekisa'a loebe loebe yagati nogo sipi luto moneuba tilotomo akeheli'ohube. 14 Ana nogouba agelo napa 6 ai pikuli fu lu'ehinamo ma luto lu emi'ehina: Yufalati nagami olopalo agelo loebe loebe naga'i epi'ehina enali'i gulu ho epolobo. 15 Ya luto lulago agelo loebe loebe enali ana hite ana kufugu to ana ikato ana kanalo to ana yupahi hupamone'isi ya'ma metoga bona'i fi loko hite le'mo loebe monebe hilete nehinogo li nupa mone ya'ma enehe su halabe luto enegeba hite mine'ahana enalimo ya'ma gulu ho epolo'ehinamo yabe. 16 To gimi mage'i hiti bona'i hosi yagamagihi enemegesalo mine'ahana enali samahi tite napa'ani 200 milioni yabe lago keheli'ohube. 17 Bona'i hiti hosi yaga hiti enali babeyafa ya'ma nani bamu'i bu go tegi huto ma huto bu go'ohube: Kefe gu'ani i kolo bise'na ya'ma logo guluya meha'a suhi safa'na to okohona tegi mone leukehi oka'a to gufi'i satugu tegi hite i kolo bite mine'ahana. To hosi yagamagihi lataha'ani ya'ma laeoni akafu kalamagihi lataha'ani ya suhi huto nohigo enabagaguti ya'ma logo guluya meha'a to lokiya hiti to gufi'i logogu nolago bu go'ohuna. 18 Hosi yagamofihi bagaguti ya'ma logo guluya mehi to lokiya to gufi'i kefa logogu lolago limito metoga bona'i fi loko huto loebe monebe lolo nohigo li gehesa monelugu ya'ma enoho su ho'ehina. 19 Hosi yagamagihi amuya'ani ya'ma enabagagu to kasa'aniga mino'ehina. Kasa'ani ya'ma osifa tegi huto lataha'a hiti nohigo yanatu bona'i enagabu gise nasana epilata nehana.

20 To ana kufe kafe nasanauba bona'i luga'a meenoho'ehinamagi enali komopa'ani li gelehe mehise enali fa'mene nasana lolo hite lilete lila lila hi'ahana ya'ma li mehe'mi'ahana yabe. To foipa felemofihi to faga lugefa nasana golitu to silibatu to aeonitu to efatu to yafatu lolo hi'ahana'a be gete kehelise'na meni'ina'a to kapo moloto mebuse'namofihi ya'ma lipite enalapusa fi epite mine'ahana. 21 Ya hite minete, bona'i enehe fililata'a to nalisa to moko lise'na to gumina nasana ya'ma mehe'mi'ahanamo ni'igi anana kumu komopa'ani i gelehe mehi'ahana yabe.